Шар Планина: шаренило од убавини, ризница на биодиверзитет и ризница на културно наследство. Но и ризница на проблеми.
Шар Планина е еден од најголемите и највисоките планински масиви во Северна Македонија. Сместена е во северозападниот дел на земјата, на границите со Косово и Албанија. Нејзин највисок врв е Титов Врв – 2.748 м. Оваа планина се соочува со сериозни проблеми.
„Шар Планина е едно богатство од проблеми од, прво негрижа и игнорантен однос на институциите, а потоа и на граѓаните, независно дали е тоа локално население или посетители. Најголемите проблеми се врзани со долгогодишното игнорирање на илегалните активности,“ вели Анела Ставревска Панајатова од Националниот парк Шар Планина.
Илегалната сеча и нејзиното несанкционирање ја прават Шара едно од местата со најголем ризик во државата за ерозија, поплави и свлечишта.
Друг проблем е намалување на бројната состојба на дивите животни кои се поврзани и прават здрав екосистем.
Сериозен проблем е и справувањето со отпадот кој што се акомулирал со години. Со години не се собира отпадот од високопланинските села. Проблем е и игнорантниот однос на граѓаните.
Сепак, на списокот на најголеми болки на Шара се хидроцентралите. Изградени се 13, а во моментот се води битка за уште две за кои државата веќе дала одобрение.